• 28 مارس، 2024

رئيس التحرير

ناجي وليم

سهام ميلاد تكتب : سى السيد زمانه

شخصية سى السيد هذا مش شخصية وهمية أو كانت موجودة فى زمان مضى .. شخصية سى السيد موجودة فى كل زمان ، أفكار وعقائد راسخة فى عقول الشباب، فمازال بعض الشباب لحد وقتنا هذا عندما يريدون الارتباط والزواج يبحثون عن مواصفات معينة لزوجة المستقبل أهمها أن تكون هادئة وطيبة بتسمع الكلام ومنكسرة صغيرة فى السن ..

وتكون ست بيت شاطرة وبنت ناس طيبين وطبعا كل الشروط ديه راجعة لشخصيته المريضة الضعيفة علشان يقدر يسيطر عليها وتكون تحت طوعه وتبقى الجارية اللى جبتهاله نينا علشان تنفذ أوامره وتسمع كلامه ومتقولش غير نعم طيب حاضر، وأهلها الناس الطيبين لو فى يوم زعلها يقوللها الست ملهاش غير بيتها وجوزها واستحملى كل الرجالة كده ..

وأنا بقولك لأ اللى كده هما بس الشخصيات المريضة الضعيفة الفاشلة النوع ده هو اللى بيحب شريكة حياته تكون أضعف منه وأصغر منه علشان يقدر يحس إنه قوى، وإنه مسيطر وإن زمام كل شئ فى ايده وأنه سيد البيت، وبالتالى يخاف ويهرب من البنات ذات العقلية المتفتحة الأكثر ذكاء منه واللى شخصيتها قوية.

لأنه أمام هذه الشخصية الذكية القوية يحس هو بفشله وضعف شخصيته وعدم قدرته على تحمل المسؤولية أمامها رغم إنه مفهوم خاطئ ورجعى فالبنت القوية الذكية هى القادرة على مسؤولية بيتها وتربية أولادها صح وتساعده وتكون سند وعون له ووعارفة بذكائها إزاى تتلاشى حاجات كتير ممكن تضر بيتها وحياتها الزوجية.

ومن مقومات نجاح الحياة الزوجية التكافؤ والتقارب فى المستوى التعليمى والمستوى الاجتماعى والمستوى الفكرى والتقارب فى أعمارهم، حتى يتواجد التفاهم ويتواجد لغة حوار راقية بينهما ، فالرجل السوى غير المعقد نفسيا وناجح فى كل أمور حياته.

فأول اهتمامه فى اختياره لشريكة حياته عقلها وذكائها وقوة شخصيتها وقوة تحملها للمسؤولية ليكونا معا حياة زوجية ناجحة هادئة متكافئة فيا كل بنت مقبلة على الزواج لاتنساقى لمن لايقدرك ويقدر عقلك وذكائك ولاتغيرى فى شخصيتك من أجله.

ولاتقبلى بأى شروط حتى يرتبط بيكى ولو طلب منك ذلك ووضع شروطه يروح يدور على أمينة .

ياسى السيد أنا مش الست أمينة ولاعمرى من غيرك أكون منكسرة وأحط ايدى على خدى وأبقى حزينة ومستنية عطفك ورضاك وأفرح بهلتك علينا.

فوق مش أنا اللى استناك وكل آمالى معاك وحياتى من غيرك ملهاش قيمة ولاعمرى هبيع حريتى ولا أتنازل عن عقلى وشخصيتى ولا عمرى هقبل أكون لأى سى السيد الست أمينة .

المقال السابق

بعد 18 شهرا من الإغلاق .. إعادة فتح دير سانت كاترين أمام السياح

المقال التالي

فيديو ..المصيلحي يكشف تفاصيل بطاقات التموين الجديدة

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *