بالاهتمام تستطيع ان تملك قلب المرأة ... جريده المشاهير

مقالات
| 2017-10-14 04:18:05

 

كتبت /  مي مجاهد

أنتي بنت تافهه أنت مبقتش تحبني .. جملة وراء فشل معظم العلاقات بين الجنسين وخاصة تلك العلاقات السطحية البعيدة عن عمق سيكولوجية المرأه.
 حيث تتغير مشاعر المرأه طبقاً لمدى الإهتمام و الاحتواء و شعورها بالأمان.. بمعنى طول ما البنت مش حاسة بأمان في مستقبل وشكل العلاقة هتلاقي العلاقة زي الجيلي بتتهز مع اي حركة .. البنت مش محتاجه كتير محتاجة ضحكة محتاجة فرحة محتاجة دفا وأمان ونظرة تفهمها وتفهم طبيعتها.

ومن وجهه نظري البنت بتدخل أي علاقه بكل مشاعرها وأحاسيسها وبتصدق الكلام الجميل ومع الوقت الملل والفتور بيكون اقوى من الكلام ومع غياب الإهتمام بتفقد العلاقة توازنها وتبدأ الخلافات هو بيقول أنها تافهه وهي بتقول مبقاش بيحبني💔

#ببساطة شديدة البنت محتاجه
¤ حد يسمعها حتى من غير ماتتكلم ،
¤ لحظة ضعفها حد يقويها بإحساسه،
¤ لحظة سكوتها حد يصمم انها تتكلم مش يطنش،
¤ لحظة حزنها حد يكون حضن بس بعينه يكفيها كل الكون،
¤ حد يحاوط عليها برموش عنيه تحس معاه بالأمان تتشعلق في ايده كفوفه تقولها اطمني متخافيش،
¤ حد يدفعها للنجاح بكل قوته وتلمع عيونه من الفرحة وهي بتتقدم جمبه وحواليه ،
¤ حد ياخد بأيدها ويعديها مطبات الحياة ويشيل عنها وجعها والمها وقرفها ويخبيها ورا ضهره ،
¤ حد يحسسها أنها أحلى بنت في الكون مينساش يلمسها بحنان ويحضن وشها وهو بيقول وحشتيني ياقمري،
¤ حد يتقبلها زى ما شافها أول مرة مش ديما نقطة خلافهم أنه اتغير واهملها يحس باشتياقها مش يقولها بقيتي ندابة ونكدية،
¤ حد يتحمل مودها اللي بيتغير 100 مرة فى اليوم يهتم بيها ويأخذ باله منها يقومها ويراعيها.

#إحتياجنا مش لكلمة من 4 حروف إحتياجنا لوطن يجمع لهفة الاب.. براح الاخ.. حضن العاشق.. حنان الصديق.. خوف الإبن.. سند الزوج..
احتياجنا ببساطة لراجل يملك كل حياتنا بافعاله اللي نشوفها بعنينا مش كلام ووعود متتحققش ولا تتحس راجل يهتم.. وبس ☺ .

لو لاقيته بالفعل بيملك عليها كل كيانها وحياتها وقلبها احنا بكل وضوح مش تافهين لكن للأسف في غياب حقيقي لمعني كلمة رجولة👌
ونصيحتي لكل بنوتة أنتي جميلة تستاهلي الدنيا وماعليها متتهاونيش في اختيارك لأنك انتي اللي هتخسري .. عمرك وكسرت نفسك وقلبك .. احباطك وتعبك على حد ميستهالش ولو حسيتي عقلك بيقولك في حاجه غلط اقفي فوراً وعيدي حساباتك حتي لو قلبك مش عايز .
#فكري قبل ما تكملي و إلا متلوميش وقتها غير نفسك
#فكري
#مي_مجاهد




أترك تعلقك
تصويت