زيزت فواد تكتب عن عبقرية ماجد الكدوانى

زيزت فواد تكتب عن عبقرية  ماجد الكدوانى

 

زمان من حوالي ٢٠ سنة ظهر ممثل شاب كوميديان جسمه مليان إسمه جديد و غير مألوف إسمه ماجد الكدواني .. و كعادة الممثلين اللي جسمهم مليان بيتخصصوا في أدوار الكوميديا .. إبتدا يظهر في أدوار كوميدية بسيطة و إتشهر في وقت قليل جداً ..

افلام مسيحية

و كمان مثل مجموعة من الأفلام المسيحية اللي أثبت فيها جدارته التمثيلية عن إستحقاق و إن عنده إمكانيات جبارة لسه مظهرتش علي المستوي العام .. زي دوره في فيلم ضيف من السما و تجسيده للراهب إندراوس الصموئيلي و بعدها تجسيده لزوج أم الغلابة ..

و إستمر في تقديم الكوميديا علي المستوي العام و فجأة إختفي قليلاً و بعض النقاد قالوا إن ماجد الكدواني كبر و مكانه هيتاخد و يروح لفنان تاني ..

قالب جديد

لكن ظهر ماجد الكدواني في ثوبه الجديد .. مش بشكل الشاب المليان اللي عرفناه زمان و بيضحك الناس بحركاته و إفيهاته لأ في صورة راجل كبير بدقن بيضا ووزنه أقل من الأول و بيمثل في فيلم هيبتا .. كتير مننا إستغرب شكله و قال مش هو ده الكدواني اللي نعرفه و غالباً المكان بتاعه يظهر حد تاني هياخده فعلاً ..

لكن هو مكانش شاغله إن حد ياخد مكانه أو مياخدهوش .. لكن بالبلدي كان بيغير جلده كان بيطور من نفسه و يطلع نسخة جديدة تتناسب مع سنه و شكله و العصر الجديد ..

لمسة انسانية

و بالفعل سنة بعد سنة إبتدينا نشوفه في أدوار مختلفة تماماً .. مش كوميدية بشكل مطلق لكن أغلبها لها هدف و لمسة إنسانية حتي لو كان دوره عبارة عن مشهد واحد في العمل .. زي مشهد المدمن المتعافي في مسلسل تحت السيطرة اللي فات عليه سنين طويلة و لحد دلوقتي الناس فاكرة المشهد ده أكتر من المسلسل نفسه ..

1. إدارة الموهبة

لو هنتعلم من ماجد الكدواني حاجة
هتكون هي إزاي ميشغلكش مكانك أو أكل عيشك .. أكتر ما يشغلك هتطور من نفسك إزاي و هتقدم إيه في اللي جاي و هتدير موهبتك إزاي و توظفها في أعمال و طرق تسيب تأثير حتي لو مشهدك عبارة عن دقيقة واحدة إزاي هتستخدمها صح ..

ماجد الكدواني مش مجرد ممثل
لكن نموذج مهم يحطه أي شخص في أي مجال عايز يبدع في مجاله .

شابووه ماجد الكدواني 👏