أزمة منتصف العمر

الثمن..أزمه منتصف العمر ..

مسلسليين من اللي بتعرضو دلوقتي علي شاهد مختلفيين في الأحداث بس بيجمعهم عنصر واحد من وجهه نظري في تشكيل شخصيه البطل(وهو دور الأم)..

أنا من الناس اللي مليش في الدراما أوي و من النادر إن أجبر نفسي أتابع أحداث مسلسل معين بس من كتر ما قريت في جروبات كتيره و من كتر إنشغالي بدور الأم في حياه ولادها حبيت أتفرج و أشوف..

في الثمن زين كان ضحيه أم شخصيتها قويه ..قويه جدا كمان..بتحاول تفرض رأيها طول الوقت بعنف رهيب و بتحاول تدفع إبنها ثمن غلطه أبوه إنه إتجوز و سابها فكرهت إبنها في فكره الستات عموما و علمته يتعامل معاهم بإحتقار رهيب طول الوقت كنوع من أنواع رضا الذات ورد الكرامه لنفسها ..

عمر بقي أعتقد هو تركيبه مريضه من الأساس بس ظروف موت والده و إنشغال والدته عنه خلته معندوش ثقه في نفسه وجعان حب ماشي بيدور عليه في كل مكان من غير اي حسابات عقل و لا دين و لا تربيه أصلا ..هو ضحيه أم بس ضحيه مؤذيه لنفسه و لكل اللي حواليه بطريقه مرعبه و كان مكانه المصحه فعلا..

يمكن لما بشوف راجل بيتعامل مع مراته حلو دايما قبل ما بدعيله بدعي لأمه و أبوه و ببقي عارفه إنه نتاج تربيه سويه سليمه..طالع من بيت مستقر عرفه قيمته نفسه وقيمه غيره ..و علمه إن إحترامه لغيره بيزيد إحترامه لنفسه..علمه إن الزوجه دي أعظم كيان في الوجود ..علمه إزاي يتعامل مع الست و يقدر وجودها في حياته ..علمه إن مشاعره توجهه للشخص الصح في المكان الصح ..مش يبقي ماشي يشحت حب و إهتمام من أي حد معدي في طريقه ..ويدمر نفسه ويدمر كل اللي حواليه ..

دايما عندي قناعه إن الأم هي الأساس في السواء النفسي لولادها أو في تدميرهم و مفيش لادكاتره و لا معالجيين و لا أخصائيين و لا مدربيين هيقدرو يخلقو حاله التوازن النفسي و العاطفي و يوصلو الطفل لحاله الإشباع والثقه بالنفس قد حضن الأم ..

متستهتروش بدوركم الحقيقي..دوركم مش الأكل و الشرب و الغيارات و الزعيق و الواجب و التمرين ..كل دي أدوار ممكن تلاقي مساعد لك يساعدك فيها ..بس الدور الحقيقي اللي عمرك ما هتلاقيله بديل هو دور الأم..الحضن..الأمان..الطمأنينه..الإستقرار..الحنيه..العقل..الحكمه..دورك الحقيقي إنك تطلعي للمجتمع شخص سوي نفسيا شبعان حب وثقه عارف قيمه نفسه كويس اوي اوي اوي و قادر يدخل في علاقه واحده سويه و ينشأ أسره سويه و يطلع أطفال أسوياء قادريين علي فتح بيوت سويه في يوم من الأيام ..