الشرير اللي لازم تحبه

السنة اللي فاتت كتبت بوست و قولت لية بنحب مستر قدري ، بس السنة دي هكتب صيغة البوست بطريقة احسن .. احنا لية بنحب محمد شاهين ؟

محمد شاهين عمري ما حسيت انه من الممثلين اللي بتدور علي اللقطة ، عمري ما شوفت جريدة سكتها مش تمام منزله عنه خبر ، عمره ما شوفتله اي تفاعل علي وسائل التواصل الاجتماعي مستفز ، محمد شاهين علي المستوي الشخصي و هو بيتكلم انسان راقي و محترم ..

محمد شاهين عمره ما فرض نفسه علينا علي الشاشة ، تامر و شوقية كان بداية له و لحظات حلوة كلنا افتكرناها ، توماس في الكبير اوي .. كان خفيف جدا جدا و عرف امتي يخلع قبل ما نقفل من وجوده ، حتي دوره الصغنن اوي في حريم كريم كنا متعاطفين معاه و شايفين بسمة شريرة ..

بيكبر محمد شاهين و بتكبر مساحته ،بنتفرج علي السبع وصايا ،ونوس ،الزيبق ..

بعدها بيلعب محمد شاهين لعبة تانية و يستغل الشعرتين الابيض اللي طلعوا و اللي كانوا حلوين عليه و ننط لمرحلة

– موضوع عائلي
– سوتس بالعربي
– الهرشة السابعة

الحقيقة انه اخر ٣ اعمال دول ، كان هو له فضل كبير في نجاحهم ، مين مكنش بيستني المشاهد بتاعته مع ام ليث ؟

مين مكنش بيحب مستر قدري مهما كان غلس؟ اللي هو غلاسة الدنيا في انسان ، بس شرير دمه خفيف زي اشرار الكرتون زمان ، شرير انت بتحبه ..

و اخيرا ادم ، ادم الاب و الزوج الحنين اللي له هفوات و عصبية و جنان بس قلبه طيب ، الزوج اللي الا حد ما في كل بيت بيغلط و يعتزر ، بيحضن و يطبطب و يشد و يتخانق و مشاهده مع الاطفال في الحلقة اللي قبل الاخيرة كانت بتوجع قلبي..

1. شكرا محمد شاهين انك كل سنة بتعرف تختار ادوارك صح ، شكرا انك ممثل جميل و راقي ????

زيزى فواد