يوستينا ألفي “قيمتي ” تمنعني من الركض وراء اراء الآخرين .. مهما كانت مكانتهم
مفاتيح الراحة النفسية : ” كن نفسك … كن قيمتك ”
مش مهم تكون مُبهر لحد المهم تكون حقيقي وواضح قابل نفسك بكل ما فيها واللي بيحبك هيقبلك زي ما انت انت مش جاي الدنيا تبهر حد أو تعمل حاجة مش ملائمة لشخصيتك
كن انت ، كن نفسك ، مش مطالب تتقمص شخصية حد أو تكون شبه حد . كل واحد عنده اللي يميزه عن غيره ، مفيش حد شبه حد ، كل واحد عنده مواهب وقدرات تميز شخصيته ، الشطارة أنه يستغلها وينميها صح وميعتمدش علي آراء اللي حواليه بس ويكون واثق من نفسه وإمكانياته صح . لان اللي تقدر تعمله غيرك ميعرفش يعمله عشان انت مميز فيه وقادر تنجح وتبدع فيه .
خليك واثق في نفسك ومن قدراتك ومهاراتك وعارف قيمتك .راي اللي حواليك مش هو اللي بيديك قيمة ، قيمتك في نفسك وفي شغلك علي نفسك وتنمية مهاراتك ووصولك لهدفك مهما كان الهدف بعيد ، وانت بتحاول وتتعسر في الطريق لكن في النهاية هتوصل وصول عظيم ملئ بالانتصار والعظمة ، ساعتها هتثبت لاي حد مقدرش قيمتك أو قلل من مهاراتك ومواهبك أن وصولك عظيم ويستحق التقدير .
واجه اي تفكير سلبي يقلل من ثقتك بنفسك ويشتت افكارك ويهدم امكانياتك ، اتمسك بالافكار الإيجابية اللي هتبنيك وتنمي شخصيتك ومهاراتك ومواهبك .
ومن بختك لو في حياتك ناس حلوة اللي بتقبل وتستوعب اللي حواليها زي ما هما ويشجعوك وشايفينك حاجة جميلة تتحب وتتشال علي الرأس ، قادرين يميزوا الحلو اللي جواك ويشجعوك تكمل الطريق وانت واثق من نفسك مهما كان حواليك محبطين وأعداء للنجاح ، السكة طويلة ومحتاجة كل عزمك واصرارك . النور اللي جواك هو اللي هيقويك تكمل الطريق وقادر علي التحديات.
وانت في الطريق هتلاقي ناس شايفين مواهبك حاجة عظيمة ، عمرهم ما هيقللوا من مواهبك ولا مميزاتك لان عارفين قيمتها وشايفين قدامهم انسان مميز ، الناس دي نور لحياتك . أما اللي هيهد منك متلتفتش لكلامه ولا تفكر فيه .
الخلاصة واحدة من مفاتيح الراحة النفسية والسعادة هي أنك تكون حقيقي مع نفسك، بتعمل اللي إنت عايزه وحاسس بيه، بغض النظر عن رأي الناس.
“Be true to your self”
