ماجد مفرح أصل الحكاية.. امال فهمى وفيلم مراتى مدير عام
كتبت / زيزت فؤاد
من حوالى 57 سنة اتعرض فيلم “مراتى مدير عام” من اخراج فطينعبدالوهاب وبطولة دلوعة السينما شادية وصلاح ذو الفقار ”
بس الحقيقة مش هى دى حكايتنا .
النهاردة انا هكلمكم عن المذيعة والإعلامية الكبيرة “أمال فهمى”
طيب مين هى امال فهمى وايه علاقتها بفيلم “مراتى مدير عام” ؟
أنا اقولكم .. آمال فهمي أيقونة من أيقونات الإذاعة المصرية كانت بتتمتع بصوت ذهبى ولقيوها بـ”سيدة الناصية” و”ملكة الكلام” .. وصوتها المميز اتربت عليه أجيال وأجيال .
علاقتها بالفيلم انها هى البطلة الحقيقية للحدوتة … ايوووة هى كانت المدير العام وزوجها موظف معاها فى نفس الشغل .. أمال فهمى اتعينت مدير للإذاعة و جوزها ” محمد علوان” كبير مخرجين الإذاعة وقتها يعنى هى بقت رئيسه المباشر فى الشغل .. الحكاية دى عجبت جدا الكاتب الكبير عبدالحميد جودة السحار .. وسعد الدين وهبة .. فعملوا منها قصة وسيناريو وحوار وقرروا يعملوها فيلم سينمائى .. والفيلم نجح نجاح مبهر وكان من المفترض يتعمل بعده فيلم “مراتى وزير”.. لكن للأسف ما اتعملش .
نرجع بقا لأمال فهمى .. أيقونة الإذاعة المصرية اتولدت سنة 1926 فى حي عابدين .. وفى عمر 8 سنين اختارها بابا شارو تغنى معاه فى الاذاعة أغنية “قطتي صغيرة واسمها نميرة” .. ومن ساعتها وهى مغرمة بالإذاعة وبقا حلمها الوقوف أمام الميكروفون و تبقى مذيعة مشهورة زى “بابا شارو” .
أمال فهمى لما حصلت على البكالوريا اللى هى الثانوية العامة دلوقتى .. إلتحقت بكلية الآداب قسم اللغة العربية ، ودرس لها عميد الأدب العربي طه حسين .. وبعد التخرج اشتغلت بالصحافة سنة واحدة بمرتب شهرى 160 قرش .. وبعدها اتقدمت للإذاعة ونجحت فى الاختبارات واتعينت بـ 17 جنيه .. وكانت وقتها أول وأصغر مذيعة فى إذاعة الشرق الأوسط .. وقدمت برنامج “حول العالم” اللى كان بيقدم تسجيلات نادرة من كل دول العالم .. وبعدها عملت برنامج “هذه ليلتي”.
وبعد نجاحها فكرت تعمل حاجة مميزة وعرضت على الاذاعة فكرة عمل فوازير لرمضان واتوافق على فكرتها .. وكمان قدرت تقنع أمير شعراء العامية ” بيرم التونسي” ، والشاعر “صلاح جاهين” انهم يكتبوا الفوازير للإذاعة .. يعنى الفضل في الفوازير اللى كلنا استمتعنا بيها سنين طويلة بدأت من عند أمال فهمى فى الاذاعة ؟
حد هيسألنى امتى بقا أمال فهمى بقت مشهورة ؟
الحقيقة شهرتها بدأت لما قدمت برنامج “في خدمتك” وكان المستمعين بيبعتولها مشكلاتهم وتعرضها على المسؤولين لحلها .. البرنامج ده نجح نجاح غير عادى ، وكان بيوصلها في اليوم حوالى 500 جواب مليانين مشاكل .
بعدها الإذاعى الكبير أحمد طاهر عرض عليها تقدم برنامج “على الناصية” واللى كان بيقدمه قبلها الإذاعي إسماعيل عبدالمجيد .. وقدرت امال فهمى انها تطوره وبقا وسيلة للأعمال الخيرية وجمعت تبرعات كبيرة جدا للمستشفيات .
امال فهمى دخلت موسوعة جينيس بسبب “على الناصية” لانها المذيعة الوحيدة اللى قدرت تقدم برنامج لمدة طويلة حوالى 56 سنة … مش بس كده دى هى الإذاعية الوحيدة اللي حصلت على جائزة علي ومصطفى آمين في الصحافة لانها قدرت تمزج بين العمل الصحفي والإذاعي وحولت تحقيقاتها الصحفية لإذاعية .
الخلاصة فى كلمتين زى ما عودتكم .. أمال فهمى أيقونة مصرية أخلصت لميكروفون الإذاعة ، وحفرت اسمها بحروف من دهب بين كبار الإعلاميين في مصر والعالم العربي .
رحلت عن عالمنا في 18ابريل 2018 عن عمر ناهز 92 عاما عليها رحمة الله
