يوستينا ألفي الشتا راجع يضرب من جديد.. درجات الحرارة تهبط 15 درجة والرياح الباردة تزور مصر من أوروبا!
كتبت : يوستينا ألفي
بعد أيام من الأجواء الحارة والعواصف الترابية والجو ظن الناس إن الصيف دخل رسمي، بتفاجئنا الطبيعة بمنخفض بارد ومفاجئ جاي من أوروبا، بيحمل معاه رياح شديدة البرودة وانخفاض غير مسبوق في درجات الحرارة.. وكأن الشتاء قرر يرجع لنا في زيارة مفاجئة!
الجو اتجنن؟ من 38 لـ 21 في ساعات!
سجلت القاهرة الثلاثاء حرارة تخطت 38 درجة مئوية، وناس كتير بدأت تخزن الهدوم الشتوي وتفكر في المصيف! لكن سرعان ما قلبت الأحوال، والنهاردة الأربعاء بدأت أولى موجات الانخفاض السريع، ومع نهاية الأسبوع هنشوف أرقام ماكناش نتخيلها في أبريل.
الأرصاد بتأكد إن الحرارة هتنزل تدريجيًا لحد يوم الجمعة، لتتراوح ما بين 21 و23 درجة، مع وجود أمطار خفيفة على بعض مناطق السواحل الشمالية والدلتا، ورياح نشطة لكنها نظيفة – يعني مفيش تراب وشوائب، بس الغبار هيظهر في الأماكن المكشوفة.
الخميس.. يوم صدمة الملابس!
الخميس هيكون بداية التحول الحقيقي، الجو هيبقى ربيعي بارد، ويُنصح بارتداء ملابس شتوية خفيفة في النهار، وجواكت تقيلة ليلًا، خاصة إن درجات الحرارة ممكن توصل لحدود 11 وأقل من كده في ساعات الليل المتأخرة. ده غير إن جنوب الصعيد كمان هيبدأ يحس بالانخفاض للمرة الأولى من فترة طويلة.
الجمعة.. صباحك شتوي وليلك محتاج دفا
مع صباح الجمعة هنحس كأننا دخلنا في فصل جديد. جو دافي تحت الشمس، لكنه بارد في الظل ومع نشاط الرياح، وده بيخلي اليوم مزيج ما بين الربيع والشتا. واللي هينزل بدري هيحتاج الجاكيت، خصوصًا لو في مشاوير أو شغل من بدري.
رسالة للناس: الشتوي لسه له كلمة!
الطقس في مصر دايمًا بيحب يفاجئنا، وأبريل معروف بتقلباته، لكن التغيير المرة دي عنيف وسريع. وعشان كده، لازم نكون مستعدين، سواء في اللبس أو الصحة، خاصة للي بيعانوا من أمراض حساسية أو جهاز تنفسي.
–
