يوستينا ألفي مهرائيل مجدي… أول قائدة لقطار كهربائي خفيف في مصر
مهرائيل مجدي، فتاة مصرية عندها 25 سنة، كتبت اسمها في التاريخ كأول سائقة للقطار الكهربائي الخفيف (LRT) في مصر. التجربة دي مش بس إنجاز شخصي ليها، لكنها كمان علامة فارقة في تمكين المرأة داخل قطاع النقل.
مهرائيل خريجة كلية التكنولوجيا والتعليم، قسم ميكانيكا، دفعة 2022. بعد التخرج، شافت إعلان عن وظيفة “رئيسة قطار”، اتحمست جدًا، وقدّمت فورًا. في شهر يونيو بدأت رحلتها بالمقابلات، وبعدها دخلت تدريب مكثف في ورش بدر لمدة 6 شهور، شمل تدريب نظري وعملي واختبارات دقيقة.
بعد اجتياز التدريب، دخلت في مرحلة اسمها “Double Duty”، كانت تستقل القطار بجوار سائقين ذوي خبرة علشان تتعلم منهم على أرض الواقع، وبعدها بدأت تسوق القطار لوحدها.
اللي شجعها على الخطوة دي كان دعم والدتها وأخواتها وأصحابها. رغم إن بعض الركاب استغربوا في الأول إن اللي بتسوق القطار بنت، لكن ردود الأفعال كانت إيجابية، وكثير منهم كانوا بيشجعوها بكلام حلو وابتسامة.
مهرائيل شايفة إن البنات يقدروا ينجحوا في أي مهنة، وبتقول:
“مفيش شغلانة مخصوصة للرجالة.. أي بنت تقدر تثبت نفسها لو خدت الفرصة.”
وفي شهر مايو 2025، تم تكريم مهرائيل من الرئيس عبد الفتاح السيسي في احتفال عيد العمال، وده كان اعتراف رسمي بنجاحها وقدرتها على كسر الحواجز. رئاسة الجمهورية وصفتها بـ”نموذج حي لنجاح المرأة المصرية في الوظائف الفنية والمهنية”.
قصة مهرائيل مش بس قصة نجاح فردي، لكنها بداية طريق لكتير من البنات اللي نفسهم يدخلوا مجالات كانت زمان حكر على الرجالة.
