nagi william - سهام ميلاد تكتب / كلامك عنوانك
الكلام هو وسيلة التعامل والإتصال بين الناس و بعضها والإنسان بيتفهم من كلامه وطريقة كلامه وأسلوبه
إذن كلامك وأسلوبك هما عنوانك
وأساليب الكلام كتير تلاقى أسلوب
كلام مهذب راقى هادى عقلانى وده طبعا يدل على أن المتكلم إنسان مهذب متربى متعلم راقى قريب من ربنا لأن الشخص القريب من ربنا عنده هدوء نفسى بينعكس على شخصيته وكلامه أما بقى أسلوب خدوهم بالصوت ليغلبوكم والزعيق والألفاظ الجارحة والألفاظ الخارجة وانعدام الأخلاق والإحساس ده طبعا بيدل على إنحطاط بيئة المتكلم وعدم تربيته وتفكيره الضيق فى التعامل مع الناس بيفكر أن أسلوب الزعيق والبلطجة الناس هتخاف منه وتعمله حساب ولما تكلمه يقولك هو كده عجبك ولامش عجبك أسلوب العافية والبلطجة كأنهم عايشين فى الدنيا لوحدهم الدنيا كلها بتاعتهم ديما صوتهم عالى وإزعاج مش عاملين حساب للناس اللى حواليهم وللأسف الفيئة دى من الناس كتير أوي
وأسلوب تانى من الناس يكلمك بكل بجاحة و وقاحة ويسميها صراحة
مش عيب إنك تجمل كلامك وتكون مجامل لكن عيب إن كلامك يكون فيه وقاحة بجاحة وتسميها صراحة
وناس تانى تقولك متزعلش أصل اللى
فى قلبى على لسانى كده يبقى قلبك بيارة وطبعا عارفين البيارة بيبقى فيها أيه وكل وعاء بينضح بما فى داخله وناس تلاقى طريقة كلامهم حدف طوب وناس أسلوبها مايلقش بمظهرها و وضعها الإجتماعى معدوم الذوق وناس كلامها كأنه أوامر وتهديد
وناس كلامها تنمر تقعد تنقد وتعيب وتتنمر على خلقة ربنا والتنمر ده ممكن يوصل الشخص اللى بتتنمر عليه لحالة نفسية سيئة ممكن يكره حياته وممكن توصل لدرجة القتل
التنمر ممكن ينهى على حياة أرواح بريئة لا ذنب لها سوى إنها لاتعرف تدافع عن نفسها وترد السيئة بالسيية
خلى بالكم إن الكلام مش بس بيتسمع بالأذن الكلام بيتسمع بالقلب بدليل
إن فيه كلام بيريحك ويفرحك وكلام يألمك ويجرحك وطريقة وأسلوبك فى الكلام بتفرق
ممكن توصلى كلامك بطريقة أديك بيها عينية
وهو هو نفس الكلام توصلهولى بطريقة أديك باللى فى رجلية
طريقة كلامك وأسلوبك ممكن تكسب بيها ناس وتخسر بيها ناس فأجعل أسلوبك راقى مهذب حتى لا تخسر أعز وأقرب ناس ليك
ياريت نرتقى بأسلوب الكلام ونراعى إحساس الناس فى كلامنا
الناس محتاجة كلام فيه طبطبة وتشجيع ومحبة عشان تداوى جروحهم وتستمد قوتها وتقدر تعيش
وأتمنى إن الكلام مايبقاش سهام جارحة
أرتقى بكلامك ليدخل القلب ويكون سهام حب
سهام ميلاد
