nagi william أكتر حاجة عجباني في مسلسل “علاقة مشروعة”.. هي المؤلفة والمخرج.
المؤلفة هي سماح الحريري.. وأشهر أعمالها “الحقيقة والسراب” المسلسل الدرامي الأيقوني.. والمخرج هو خالد مرعي.. وهو مخرج متمكن من الصنعة اللي في إيده.. ويكفي في مشواره أفلام زي “عسل أسود” و”آسف على الإزعاج”.
نخش في الموضوع بتاع المسلسل بقى.
القصة من الحلقة الأولى مشدودة جامد.. بنشوف رجل الأعمال “عمرو” ياسر جلال، متجوز وعنده عيال، ويبدو إنه عايش حياة سعيدة، لكن بنتفاجئ بمشهد لواحد اسمه “أمجد” الفنان مراد أكرم، بيحاول ينتحر، لكن ربنا بيكتبله عمر جديد، وبنعرف إنه عمل كده عشان طلق مراته “بثينة” الفنانة مي عمر، ومش قادر يبعد عنها، بيتدخل عمرو عشان يصلح ما بينهم لأنه صديق العمر لأمجد.. وفعلا بيرجعهم لبعض، بس بنفاجأ في آخر الحلقة الأولى.. إن بثينة بتقابل عمرو وبتقوله إنها حامل منه.
بتنتهي الحلقة الأولى.. هنا كلنا بنتصدم.
استنيت الحلقة التانية عشان أشوف المؤلفة والمخرج، هيقنعوني إزاي ده حصل، والحقيقة في الحلقة التانية بتحصل فلاش باكات بانسيابية عظيمة بتلخص العلاقة بين الطرفين وازاي اتطورت وانتهت واستعرضولنا كتير من المشاعر وتربيط الحوارات ببعض، بشكل أذهلني.
ممكن نقول السبب في تمكن الاستعراض ده في الشرح والتفسير وفرش المعلومات للجمهور اللي اتعملت بحرفنة، لأن المخرج خالد مرعي في الأساس مونتير، وقدر يستخدم حرفته الأساسية كواحد بتاع مونتاج، في إن كل حاجة تبقى مترتبة والقطعات بين الماضي والحاضر تحصل من غير ما نحس ولا نتشتت ولا نمل، الحكاية فعلا مشدودة وكل يوم حلقة بتنتهي أنا مستني إيه اللي هيحصل.
خليط من المشاعر المتناقضة.. وقصة معقدة ومركبة عن واحد بيتجوز طليقة صاحب عمره في السر.. ودلوقت مضطر إنه يطلقها عشان ترجع لصاحبه.. بس هي دلوقت حامل!!.
مسلسل دراميا مكتوب باحتراف.. بناء هايل صراع من أول لحظة وعقدة.. وفي انتظار حلها!.
مسلسل جميل بجد يستحق المشاهدة.. هادي ممتع وكمان رومانسي.. بدون تفخيم.. أو مبالغة.. هيبسطكم.
زيزت فواد
