رفقا بالمشاعر الإنسانية ياسادة

رفقا بالمشاعر يا سادة

الفترة دي صعبة اووي علي كل الناس
كل الناس مش مرتاحة ومش مبسوطة

الكل فيه اللي مكفيه وزيادة
الكل عنده مليووون حاجة شاغلة تفكيره وقلبه

مع اختلاف التفاصيل والحكايات والهموم
كل واحد سارح ف ملكوته وهمومه

تحس الناس ماشية تايهة وسرحانه
دماغها زي المفرمة, شغالة في مليون اتجاه,

ياريت نعذر بعض ونراعي بعض ياريت بلاش العتاب والتقطيم عالفاضي

ياريت بلاش جملة ( مابتسألش ليه) لو حد وحشك

ادخل وكلمه واسأل عليه وخلاص من غير عتاب ولا تقطيم

ولا كلام يسم البدن , الدنيا وضغوط الحياة شاغلة الكل يعني مش حضرتك لوحدك اللي مشغول ومهموم
والناس لاء ..

الكل مسحول في حياته واليوم بيطير وربنا وحده اللي عالم بالناس ..

ومش عشان مثلا في ناس دايما بتضحك ومبتسمة و طبعها انها مش بتشتكي

يبقي خلاص حياتهم زي الفل يعني وماعندهمش مشاكل ..

اكيد لاء بس في ناس مابتحبش تشكي وتحكي همومها

ومشاكلها ممكن تكون دي طريقة للهروب

وانها تفصل شوية عن الواقع الصعب اللي كل الناس بتعيشه ..

ف ياريت نلتمس الاعذار لبعض .. ولو في كلمة طيبة نقولها

ولو غير كدة نحتفظ بيها لنفسنا ياريت

محدش متحمل كلمة وممكن علي موقف بسيط ينفجر ..

ماريز ينى