• 20 أبريل، 2024

رئيس التحرير

ناجي وليم

عندما تصبح الحياة اسهل!!!

عندما تصبح الحياة اسهل!!!

امبارح ناس اصحابي جايين يزوروني فا بيقولولي نجبلك إيه معانا ؟!
قلتلهم… مسحوق غسيل لو سمحتم!!

نهال بطلي تهريج…

والله العظيم عايزة مسحوق غسيل ويكون چل من فضلكم..

بتهرجي…!!

لأ مابهرجش ، أنا فعلا” محتاجة مسحوق غسيل ، و هاروح اشتريه ، فا بدل ما تروحوا تجيبوا طبق حلويات شرقية ولا تورتاية بالشئ الفُلاني ولما اكلها هاتخن والسكر عندي يعلي وصحتي تتأذي ليه طيب نعمل في بعض كدة ، هاتولي مسحوق غسيل وهادعيلكم ونفعتوني ووفرتوا ليا… بسيطة!!!

ولقيتهم جايين وجايبين مسحوق الغسيل وبرضه تورتايه وكأن التورتايه ديه بقت تقليد ممنوع من الإلغاء, وهايكون مصيرها التلاجة لحد ماتنشف وتترمي ..

ساعات كتير بحس إن حياتنا هاتبقي أسهل لو رجعنا عادات زمان الي دُسنا عليها وهرسناها تحت مُسمي الشياكة والأناقة والإتيكيت ، لما كانت الهدوم الي تصغر علي حد تروح للي اصغر منه في العيله ، ولو جبتي حاجة ومانفعتكيش عادي تكلمي صاحبتك ولا جارتك وتقوليلها عندي كذا ومانفعنيش شوفيه لو ينفع عليكي ، أعتقد لو عملت ده دلوقتي ممكن أتواجه ب تهمة قلة الذوق العظمي مع إني قسما” بالله مافاهمة فين قلة الذوق في ( الحب) ؟!!!

أصل البساطة ديه حب ، والعفوية حب
عمري ماهابقي بسيطة وعلي راحتي كدة مع حد غير لما اكون فعلا” بحبه وعلي راحتي معاه وبيني وبينه عشم ومشاعر طيبة!!
ليه بعدنا عن بعض ؟!
ليه بقت كل تصرفاتنا بناخدها بحساسية وب مليون تفسير وشك وإهانة ؟!
ليه مابنقولش ده عشم وحب ومشاعر طيبة وبساطة و حياة سهلة وسالكة مافيهاش مطبات وتعقيدات!!!!

بحب زمان
وبيوت زمان
وعادات زمان
بحب البيوت المفتوحة والتصرفات العفوية والحياه السهله الي مافيهاش كلاكيع وعُقد ، لأن طبيعه حياتنا البساطة بس بكتشف كل يوم إننا الي بنصعب الحياه علي نفسنا…

جربوا تسهلوا الحياه من تاني
تهونوها علي نفسكم أول شئ علشان تقدروا تهونوها علي غيركم ..
هونوا الرحلة قدر الإمكان وكفاية تخلي عن عاداتنا وهويتنا من أجل مظاهر فارغة ، افتخروا بمصريتكم الطيبة وهويتكم وحياتكم لأن ده اجمل مافينا بجد..
هو ده إحنا…. وهي ديه حياتنا..

ماريز ينى 

المقال السابق

مؤتمر صحفى لتقديم حسام حسن مديرآ فنيآ وابراهيم حسن مديرآ للمنتخب

المقال التالي

زال الكابوس

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *