يوستينا ألفي أهالي الطريق الأبيض يصرخون: التطوير قادم.. لكن أين الأمان؟
كتبت/ يوستينا ألفي
في قلب منطقة أرض اللواء، وتحديدًا بشارع الطريق الأبيض، يعيش مئات الأسر حالة من الترقب والخوف بسبب ما يصفونه بـ”التطوير المفاجئ” الذي يهدد استقرارهم، ويجعلهم عالقين بين الأمل في تحسين المنطقة، والقلق من التهجير دون ضمانات واضحة.
بدأت محافظة الجيزة تنفيذ خطة شاملة لتطوير الطريق الأبيض، ضمن مشروعات بنية تحتية تستهدف تحسين الحركة المرورية وخدمة المناطق الحيوية، بدعم من الوكالة الفرنسية للتنمية.
لكن هذه المشروعات حملت معها قرارات إزالة ونزع ملكية طالت بيوتًا مأهولة منذ عقود، دون حوار كافٍ مع السكان أو عرض بدائل سكنية واضحة.
صوت من الأهالي:
أم حسام، ربة منزل: “أنا عايشة هنا بقالنا 27 سنة، فجأة قالولي بيتك هيتشال، ومش عارفين هنتعوض إزاي ولا إمتى. عندي 3 أولاد، أروح فين؟”
الحاج رمضان، صاحب محل بقالة: “المحل ده مصدر رزقي الوحيد. بيقولوا هنعوضك، طب لحد ما التعويض ييجي أعيش إزاي؟ وبعدين التعويض هيكفي إيجار محل فين؟”
سيدة مسنّة من السكان: “إحنا مش ضد التطوير، بس لما تهد بيت حد لازم تديله بديل آمن، مش بس ورقة فيها رقم!”
شاب من المنطقة: “الموضوع مش مجرد فلوس، دي حياة ناس! في ناس كبرت هنا واتجوزت وخلفت، تفتكروا سهله عليهم يمشوا كده؟”
التعويضات والتساؤلات:
أعلنت وزارة التنمية المحلية أن إجمالي التعويضات المقررة لمتضرري الطريق الأبيض ومحيطه تقترب من 1.76 مليار جنيه. ورغم تحديد بداية يونيو كموعد نهائي للاطلاع على الكشوف، يشكو الأهالي من غياب التواصل وعدم وضوح القيم التقديرية، ما يجعلهم يشعرون بالتهميش والخوف من الإزالة دون مقابل عادل أو بديل مناسب.
تعديات وبناء عشوائي:
تواجه الأجهزة تحديات إضافية تتعلق بتعديات وبناء عشوائي على الأراضي المخصصة للمشروع، مما يعقّد من عمليات التطوير ويؤثر على سلامة السكان والبنية التحتية.
رسالة الأهالي:
“احنا معاكم في التطوير، بس قبل ما تشيلونا طمنونا. ادونا ورقة فيها شقة بديلة، أو شوفوا لنا مكان نروحله. إحنا مش أرقام في كشف، إحنا بشر.”
توصيات:
ضرورة فتح حوار مجتمعي مباشر مع الأهالي.
توفير سكن بديل قبل أي إزالة.
نشر تفاصيل التعويضات بشفافية.
