nagi william خطايا مسلسل أزمة منتصف العمر
‐—————–
مسلسل منتصف العمر يطرح سؤالا هاما .ليه الجمهور كمل الحلقات للاخر رغم عدم وجود ترابط درامى ؟!
الإجابة ببساطة إننا بنحب ريهام عبد الغفور و أدائها و عندنا ثقة ف اختياراتها فطول الوقت بنقول أكيد صناع العمل هيخيبوا ظنونا و يقدمولنا ترضية في نهاية العمل و تفسير لكل مواطن الخلل في السيناريو و الحبكة الدرامية …لكن للأسف محصلش
و خلص المسلسل و جوانا ألف سؤال كلهم أسئلة استنكارية بلا إجابات سوي إن المخرج عايز كدة. اسئلة عن دوافع و خلفيات و تصرفات الشخصيات الي أقل ما توصف بيه إنها بلا منطق
١- ايه الي خلي عمر يتجوز مريم أصلآ و هو مبيحبهاش …كان بيدور علي بديل لأمه عشان اتجوزت بعد وفاة أبوه ؟ طب ده يخليه يتجوز بنت اصغر منه ب ١٢ سنة و مدللة جدآ؟؟
٢- ياسمين ايه الي كان مخليها مكسورة اوي كدة قدام زياد و مبتقدرش تفتح عينها فيه ..ايه الذلة الي كان ماسكهالها و خلتها تكتبله الاول نص الشقة ثم الشقة كاملة الي طلعت بيها م الجوازة ؟؟ إنه هو الي زقها علي خاله؟؟ طب ايه يعني خاله حبها و اتجوزها بمحض اختياره مفيش أي مبرر لخوفها
٣- عزت الي عمل لنفسه عملية تعقيم عسام ميخلفش غير مريم ..عمر حد فيكوا ف حياته سمع عن راجل عمل كد؟ طب ايه الهدف؟ ان فيروز متخلفش فتفضل مهتمة بمريم ؟؟ طب ما في ١٠٠ طريقة ياعزت تخليها متخلفش غير انك تعقم نفسك!
٤- طب فيروز لما عرفت انها ممكن تخلف عادي و ان عزت كان قاصد يوهمها ان هي مبتخلفش ده ملفتش نظرها إن ده معناه بالضرورة ان هو الي مبيخلفش؟؟ طب ده مخلاهاش تتراجع عن فكرة انها تلبسه الي ف بطنها؟
٥- فيروز و عمر ليه اول ما زياد هددهم اعترفوا من اول قلم مع انه معندوش دليل واحد علي خيانتهم …التحليل بإسم واحدة تانية و الدكتور اصلآ ملطوط و شهادته ميتاخدش بيها ليه كانوا مضطرين يعترفوا
٦- الست فيروز لمؤاخذة ايه الي جه ف بالها تحط فردة الحلق الي فاضلة معاها ف اجزخانة الحمام😀. قلة كومودينوهات و دواليب؟؟ و عمر أصلآ ليه ولا مرة لما اتقابلوا مداهاش الفردة الي وقعت عنده ف الأوضة
٧- لحقوا ف يومين البوليس يرفع كل الادلة و الشقة تنضف و المكسور يتصلح ويلاقوا مشتري كمان لشقة عمر مسرح الجريمة؟!
٨- سلمي الي عارفة كويس ان جوز مامتها بيتحرش بيها ووزع مراته عشان يستفرد بيها تقوم تجري تدخل الاوضة و متقفلش بالمفتاح! طب يا كنتوا خلوها تقفل الباب و هو يكسره او و هي بتقفله يزق الباب فمتلحقش تقفله او عالأقل متوروناش ان الباب له مفتاح كإنكوا بتغيظونا . اهو يبقي في اي مبرر للغباء ده ..
٩- الطب الشرعي ازاي مأثبتش ان مريم انت..حرت و شهادة الجيران و الكاميرات الي ف الشوارع ازاي كل ده مأثبتش ان زياد مراحش بيت العمر اليوم ده و ان فيروز و عمر همه الي نزلوا من مسرح الجريمة بعد الحادثة مباشرة
١٠- عمر رمي كل اثار الجريمة ف باسكت زبالة عمومي بحاله كدة ..الي هو الجريمة هتكتشف تاني يوم الصبح بالكتير بكل أثارها ..طب أبسط حاجة كان يح..رق كل حاجة و يرمي الرماد ف النيل رفقآ بعقولنا
١١- الست فيروز قررت تختار نهاية عمر
هي نفس نهايتها ..طب هو مش عايز يموت انتي بتقرريله ليه ؟؟ هو لا ضحك عليكي و لا خلاكي تعملي حاجة غصب عنك و لا تخلي حتي عنك انتي الي كل تصرفاتك غباء ف غباء
١٢- لما مريم أغم عليها ف بيت عمر دخلوها تنام لغاية ما تفوق لوحدها مفكروش حتي يفوقوها و حتي لما انتح.رت مفكروش يتأكدوا انها ماتت او يطلبولها اسعاف جايز تتلحق ..سابوها تنزف و هي و نصيبها
١٣- ليه عزت مجاش ف باله ان فيروز و عمر ورا موت مريم مع انه عرف انهم خانوها و ان فيروز حامل من عمر و سمع صوت الخناقة ف التليفون ازاي مجاش ف باله انهم خلصوا منها بعد ما هددتهم تفضحهم
١٤-ايه موضوع عزت الي كل شوية يهوشنا انه هين..تحر و بعدين مينفذش ..يفتح درج التابلوه و يطلع المسد..دس فنقول هوب هينفذ يروح مرجعه الدرج و بعدين يروح المصنع و يطلعه م الخزنة نقول هوب هينفذ و بعدبن يتراجع و بعد وفاة مريم يمشي ف اشارع هائم ويرمي محفظته و كل ما يساعد علي معرفة هويته نقول هوب هينفذ يقوم راجع ف كلامه في ايه ياعم عزت ده كل الي ف المسلسل ما توا وانت الوحيد الي فضلت
١٥- ايه الي خلي عزت يعترف بالتحريض علي قت.ل زياد؟؟ مفيش اي مبرر ولا دليل
و ايه اصراره انه ميطلقش فيروز بعد كل العك ده …ده انت ياعم الحاج بعد وفاة مريم العيل الي ف بطن فيروز ده لو اتولد هو الي هيقش كل الي عندك
نقطة أخيرة .هي ليه كل الناس ف المسلسل ملهاش أهل
سلمي ملهاش الا جوز امها
ياسمين ملهاش أهل
فيروز ملهاش أهل
هايدي ملهاش أهل
عزت ملوش غير ابن أخت واحد بس
الناس كلها مقطوعة من شجرة كدة ليه ؟!
دي مقتطفات من غرائب و طرائف أزمة منتصف العمر
الست ريهام احنا مسامحينها لأن رصيدها يسمح لكن صناع العمل خاصة المؤلف و المخرج مدينين لنا باعتذار عن الشلل ده كله
أما موهبة الاستاذ كريم فهمي في التأليف فهي موهبة لازم حد يخليه يرتجع عنها
#ازمة_منتصف_العمر
زيزت فواد
