• 21 فبراير، 2024

رئيس التحرير

ناجي وليم

مش هيتكرر تاني .. فيلم “غزل البنات ” فيلم اسطوري.. اعرف السبب ؟

مش هيتكرر تاني .. فيلم “غزل البنات ” فيلم اسطوري.. اعرف السبب ؟

1- فيلم غزل البنات كان بيجمع اتنين من أعمدة و مؤسسي السينما في مصر ، نجيب الريحاني و يوسف بك وهبي

“غزل البنات” موسيقى محمد عبد الوهاب

2- موسيقى الفيلم كانت من الحان موسيقار الاجيال ” محمد عبدالوهاب
3- الفيلم كان مجمع شوية نجوم ما حصلوش ، ليلى مراد ، نجيب الريحاني ، انور وجدي ، سليمان نجيب ، فريد شوقي ، محمود المليجي ، استيفان روستي ، زينات صدقي ، فردوس محمد ، عبدالوارث عسر .. * كل اسم من دول حاجة تفرح *

4- و زيادة الخير جابوا يوسف بك وهبي و محمد عبدالوهاب ضيوف شرف في الفيلم بشخصياتهم الحقيقة

5- الفيلم كان بداية ظهور هند رستم ، ظهرت ( كومبارس صامت ) ، ورا ليلى مراد في اغنية ” اتمختري يا خيل ”
و كان المفروض ليها دور و هتظهر في مشاهد انها صاحبة ليلى مراد ، لكن انور وجدي وقتها شاف ان سنها صغير انها تظهر صاحبة ليلى * هند كانت 16 سنة *

6- كمان الفيلم كان الظهور الاول لـ ( داليدا ) ، كومبارس صامت بردو .. و كان بردو الظهور الاول لـ الممثلة ” نبيلة السيد ” كانت طفلة عندها 10 سنين

7- وديع الصافي كمان ظهر فيه و كان عازف ناي

فيلم غنائي كوميدى

8- الفيلم كان ميكس عجيب ، ما تعرفش ده فيلم غنائي و لا كوميدي و لا درامي و لا ايه بالظبط ، تسمع احلى اغاني من الست ليلى ، و تضحك مع نجيب الريحاني و تعيط عشانه بردو

9- الفيلم تم اختياره في قايمة افضل 100 فيلم مصري و اخد المركز التاسع

10- الفيلم كان انتاج و اخراج و بطولة انور وجدي ، و كان مساعد المخرج معاه ” منير مراد ” اخو ليلى

11- الفيلم كان فيه 7 اغاني لـ ” ليلى مراد ” و الحان عبدالوهاب ، متخيلين العظمة .. ( أبجد هوز ، اتمختري يا خيل ، الدنيا غنوة ، الحب جميل ، ماليش امل ، عيني بترف ، عاشق الروح )

12- الفيلم كان الظهور الأخير للجميل نجيب الريحاني ، اللي مات وقت تصوير الفيلم .. و ده خلى انور وجدي يحتار هيقفل الفيلم ازاي ، و مشاهده ما خلصتش ، فلجأ لتغيير النهاية .. و روج للفيلم على اساس انه اخر افلام الريحاني و ده خلى اقبال كبير ع الفيلم ..
كتبت زيزيت فؤاد

المقال السابق

الأطقم الطبية المصرية تقدم الرعاية الصحية للمحتجزين الذين وصلوا معبر رفح وتبادل الأسرى تحت إشراف كامل من مصر

المقال التالي

كلمتين في اذن مجلس إدارة الزمالك

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *